千葉蝴蝶蘭 Phalaenopsis chibae

連續兩年都消苞，今年儲足養份抽了兩支花梗。這花感覺上唔好經常移動位置或反方向放等植株唔好追光，否則唔係幾好種，但如能放定定等幾個月適應後就會易種。

麝香石斛 Dendrobium parishii var. coerulea

今年幾株麝香石斛都食白果無花開，行過見這株藍花花瓣顏色相當深是近這兩年少見便又買了，唯眼斑顏色較淺。近來見到頗多的藍花個體花瓣都比較淺色，就算放在粉紅花旁也不是容易可以分出。

固唇蘭 Stereochilus dalatensis

舊年偷懶沒來花，結果今年開返多點補返數。這株花花瓣真的是啡啡地色而唔係開始枯。

大苞蘭 Sunipia scariosa

又是給螞蟻睇的花。

金魚石斛/重唇石斛 Dendrobium hercoglossum

這個是較淺色個體，花瓣淡粉紅色。

Chiloschista lunifera

咁多花開當然唔係自己種出來，這株是早前新買的。 這類花最傷腦筋應是淋水，次次都是懶淋水旱死。

Paphiopedilum callosum

早幾個星期無論花墟或元朗都有一批較細的拖鞋開花株，這株就是其中一株，純唔純就唔知啦，不過見部份植株的花形有點唔對版，當然亦有可能是植株太小用藥谷得太勁之故。而另一種appletonianum自己已有所以就無買，不過那些開花株相對成株真係只能算是中小苗，谷得也太勁了點。

短軸堅唇蘭 Stereochilus brevirachis

今年的短軸堅唇蘭開了頗多花，且幾株都同時來花。

紅河蝴蝶蘭 Phalaenopsis honghenensis

一路都想找一株綠色的紅河蝴蝶蘭，問了很多人都沒有，點知一株之前沒有開過花的紅河蝴蝶蘭開了一朵淡綠色花，真係踏破鐵鞋無覓處，得來全不費功夫。這類花不難種，當較低光需求的嘉多利亞蘭種就得，高散射光及大乾大濕就可，自己的經驗是健康的植株不太怕旱但一定要很高或極高散射光否則很易死的。

矮萬代蘭 Vanda pumila

這株新買的，原來根系唔係咁好，不過頗多人種這種花成活率都只有一半，希望種得到。

蜂腰石斛 Dendrobium findlayanum

以為花期過了都無乜點理佢，點知唔知幾時又開了一朵花，由於花開的時候給壓著了所以都變了形。

Dendrobium platygastrium

去年沒開，今年儲足養分開了頗多花。對這品有興趣的要留意植株成長後頗長的，不要在花店見到苗仔細細的就以意那些是成株。

Dendrobium ochreatum

這花買了不久，花心的黑斑這株算比較黑自己覺得比較靚，也有些頗淺色的。聽聞在香港唔多好種，希望種得成啦。

長生蘭 - 橫綱 Dendrobium moniliforme

近來蟲患頗嚴重，噴殺蟲水噴得重手，這株花也受到影響變晒形開得不好。

Paphiopedilum praestans

這品在香港相信比較少人種，這株花的花瓣兩端距離有7"都唔算細。這花其實開了有一段時間，只是上面一朵開得較慢等得三朵開晒下面的花都有點殘。

翅梗石斛 Dendrobium trigonopus

翅梗今年開了很多花，而且亦非常之香。比較可惜是淋水時唔小心整斷了左邊幾支花梗，否則應該更加燦爛。

迷你聚石斛 Dendrobium jenkinsii

相當好種的一品，基本上夠光就得，而且又靚，唯花壽得一星期左右有點短。

大斑點 Paphiopedilum bellatulum

這款拖鞋價錢都相當浮動，花形變化比較大，朵花大點斑點粗點花形圓點都會貴點，不過其實平平地的也一樣很好看。

細斑點/同色拖鞋蘭 Paphiopedilum concolor

近期除了是石斛的開花季節之外，亦是很多拖鞋蘭的開花季節。可能種拖鞋的人多了，近年花商入多了不同品種的拖鞋蘭要買是較容易了，可是荷包唔多爭氣很多貴價品種都買唔起，拖鞋除了某些品種之外不常有苗仔買，吓吓開花株都幾甘，還是多玩些較基本品種吧。

鉤梗石豆蘭 Bulbophyllum nigrescens

蘭花入面較少的黑花，不過花幾細亦唔算好靚無乜睇頭。