花寶門市結業

又一間在花墟的花店因為加租要結業，這個通告已經張貼了好一段時間，但相信仍有不少人不知道。聽聞主因業主要加租一倍唔知真定假，似乎舖租瘋狂加租的情況已經漫延至花墟，不知是自由行的影響還是重建局活花舊樓的問題。門市結業，亦即係暫時在花墟再買唔到發叔的紫蘿蘭同花泥，亦唔可以用較平的價格買它代理的紐西蘭水苔或花泥肥料，太可惜了，真希望下次再有活化項商舖出租時佢會入紙申請。  
講開花寶，原來好多花店老闆對佢地做生意的手法都頗有微言，又係拿貨制度僵化好似唔多願意做佢地小生意情願做大財團，在花展的零售價重平過俾佢地個批發價等，真係估佢唔到。

翅梗石斛 Dendrobium trigonopus

又係開得唔係太好。另一株都快開了，看看會否好點。

金釵石斛 Dendrobium nobile

開得麻麻地的金釵石斛

Angraecum distichum

今年第二次開花了，可惜又係一朵。由於朵花細開了都唔知所以開時朵花給壓著變了形。

香港花卉展覽2015

又是一年一度的花展，今年的主題花雖然是跳舞蘭，但唔知是否跳舞蘭價格比較貴的關係頗多地方雖有跳舞蘭出現，但就明顯無預期咁多，亦比往幾年的主題花出現得少好多。近銅鑼灣入口那邊很多用花來砌出的女model公仔，其實有乜咁得意，返而近天后那邊的大形花公仔較有睇頭。各種花及花的擺設亦不少，可拍攝的地方很多。  
今年的盆景區是近期最沒睇頭的一年，近乎清一色都是標準港式盆景，即主要用一株或幾株貴貴靚靚植物作擺設，與其說是盆景不如說是盆栽比較合式，山水的意景完全欠奉，國內隨便一個較大形盆景區展品都比這裡的優勝，唔係話植株比這裡的好，而是山水上的意景無得比。  
比較可惜的是越來越少花場來展會擺檔賣花，沒了本地幾間主要賣原種的蘭場，沒了台灣及部份國內的展商，又沒了發叔的紫蘿蘭，真真可惜，貴金太貴確是很大原因，其實參展品展示區及玩遊戲區那邊有大量空間沒有使用，可否考慮增加多些攤檔或其它東西。

最後當然要幫襯吓買吓野，很喜歡這種小素燒盆，盆身比較薄很透氣，淋水後不用幾秒已見到水在盆外透出，很清楚知道淋水淋得透唔透，而且由於透氣度高入面植料乾得較快植物無咁易爛根，用來種多肉植物很好，種蘭花亦合識但底下的孔按所用植料有可能要自行開大些。碟底亦是用同一物料做所以不會太積水因乾得快，缺點當然是放的地方可能會有水印積或要用野箋箋底，另外由於比較薄所以較易爛易崩。

Dockrillia rigida

之前種到一大叢點知冬天至來中菌死晒咁濟，好在剩底少少暫時算是穩定下來重開埋花，等天氣再好點要搞搞佢。

Tulipa batalinii Red Gem

臨過年前繽繽減價廿蚊包的鬱金香球莖，開出來估唔到是黃花紅間，不過混種好多時都肯定唔到開出乜野花。這屬於劍葉矮種，植株細細花相對來講都算大，感覺上比一般鬱金香易及快種到開花。

Paphiopedilum gratrixianum

這種拖鞋蘭其實都幾靚，但唔知係唔係唔多值錢所以都比較少見。

大苞鞘石斛 Dendrobium wardianum

只得一朵花叫做好過無，但今年唔知過唔過到夏天。

龜殼 Paphiopedilum venustum

開得只是麻麻地的龜殼。

Paphiopedilum wardii

這株是在很多株入面選出來的所以顏色比一般正常的紅得多。